An Kernowek ew eyth Kernow, ha y thew tavas Keltek. Y thew kehavall then Kembrek han Arvorek a ve per ogas thotha pel then vrma. Y ma try oydg in story an Kernowek,
- an Kernowek coth (bys dro 1150 wosa christ),
- an Kernowek crys (the worth 1150 bys dro 1500 w.c.),
- an Kernowek nowyth (the worth 1500 bys dro 1800 w.c.).
Nyns o an Kernowek cowsys in Kernow wosa dallathfas an nawdegvas cansblethan. Pub den oll a glappia an Sowsnek. Tavas Kernow a verwys in kerth dre lyas reson. Lyas den a bredyras the vos pith besya dysky an Sowsnek rag dendel an muna in pow a ve rowlyys gans an Sowsen, ha rag gwaynya wolak the worth tus erall. Gans henna y ma resonow erall in weth. Whath an eyth ew dasvewys in cansblethan ma may thew cowsys arta in Kernow gans lyas den.
Remenadow an Kernowek coth ew on scryf vgy ow ry syth folennow a gyrryow ha y ma nebas laverangow a scryffans in levrow scryffys in Lathen. Y ma nebas levrow scryffys in Kernowek crys. Y thens levrow a waryow an egglos hag on can hyr an egglos hynwys Pascion Agan Arluth. Y ma nebas tammow a scryffans in weth. Y ma lavar cowsys fatell o gwaryow an egglos rys bys dallathfas an sythdegvas cansblethan. In Kernowek nowyth y ma nebas scryfow in eyth cowsys, ny canow kepar han gwaryow scryffys in Kernowek crys. An scryfow ma ew drys ehan lythyrow ha lavarow ha y ma nebas scryfow a gyrryow in weth.
Yma an follen ma ow ry in vrma nebas daralles ha pith arell in Kernowek. Ny a vyn ry scone scryf in kever story an Kernowek, the worth dallathfas awos an Sowsen the thos then dasvewas awos an eyth the verwell in kerth. In vrma nyns ew an scryf ma scryffys mas in Sowsnek. Gwell an follen Sowsnek ragtha in vrma. Scone ny a vyn gorra moy daralles in follenow ma in weth, mas y thens in follenow Sowsnek in vrma. Y ma lyas den ow tysky an Kernowek in vrma dre reson an eyth the vewa arta hag an follen ma a re an ahoson the clappyoryon an Kernowek redya moy in Kernowek. Kepar dell reta gwellas, y ma dew sort an Kernowek in follenow ma, y ma an sort o clappyys gans Tregear in whedegvas cansblethan hag in weth y ma an sort o clappys in Penwith hag in Kerrier in deweth sithdegvas ha in dallathfas ethdegvas cansblethan. An Kernowek nowyth ew onyn an sortow vsy dasvewys in cansblethan ma.
Mar menta gothfas moy in kever an Kernowek rys oma, danvon e-mail thyn worth an trygva ma, Kevren: Mar menta fatell ren gull kevren theth follen, danvon e-mail the, |
Dallathfas : Daralles : Gunnadar : Tre
in English : en francais : auf Deutsch : in italiano : Home
The Cornish Language: an Kernowek or an Kernewek.
Bespoke web design, search engine optimisation and online marketing by BB Web · Cloud Hosting by Netramp
©1997-2023 Penglase.com All rights reserved.