NEBAS DARALLES

IN KERNOWEK


Dallathfas   :   Daralles   :   Gunnadar   :   Home

Yta nebas daralles in Kernowek (Kernewek). Ny a ra ry moy a tharalles pan ren cafus an tyrmyn thega scryffa. Y ma an daralles oma ow ry in arbennek an bewnans han story Kernow hay fobel, mas y ma daralles erall terwithyow in kever ken taclow, scryffys warlerth an whans.

Yta an daralles parys in vrma. Dew anetha ew scryffys in dialek. Leff Kernow ha Flowren in y Blew ew scryffys in eyth Tregear.

  • B: Eyth Bew

  • B: Pow Kernow 1

  • A: Leff Kernow

  • A: Flowren in y Blew

Eyth Bew

Y thew an daralla ma scryffys in dialek.

Dolly Pentreath, benen Gernooak a reeg clappia an Kernooak, verwys en vlethan zitack cans try igans ha zitack. Meth dean drova an dewetha clappier teithyack an Kernooak a ve. Buz na reeg an tavaz merwall pereeg merwall an venen ma. Rerol glappiaz an tavaz. William Bodinar o poscader bohodgack, screffaz en Kernooak drell pemp dean orol et e dreav clappia an Kernooak. Leeaz dean orol rug a cuthvas an peath a riganz clowaz carra contrevagadgow Dolly Pentreath. An benenez ma oya gorrub Dolly tha Sows periga goofen urtans ell Dolly goath cowz an Sowsnack. Dolly serraz ha lavaral en Kernooak nagew hye zawk ha rag sertan hye ell clappia an Sowsnack carra pub dean orol. Hye thowethaz e gorrub gen e breas an Sows, urt e greia cronack an hager due.

William Bodinar verwys en vlethan zitack cans pager igans ha puzwarthack. Metessen nab teeze glappia an Kernooak whathe bis an vlethan itack cans. Ca creeg an eyth merwall nena dean ell clappia an Kernooak arta lebben, rag teeze an dasvewaz en cansblethan ma ha mowns urt e glappia arta en Kernow. Che ell boaz clappier an Kernooak aweeth mar menta. Ma leeaz dean urt e thesky en Kernow hag en tellyrryow erel aweeth carra Ostralya.


Pow Kernow 1

Y thew an daralla ma scryffys in dialek.

Me zavaz war an dreath ha meeras urt an gorroll broaz lean e golow gwidn. Thera golow caar tha pow orol neb o pel drez an moar. Me alga gwellhas whathe an deeze warnotha, ago dilladgow era spladna gen lewiow, rooz, gwidn, blou, gwear. War an gorroll thera leeaz dean, stennorion ha rerol, gen ago gwregeth hago flehaz. Thera oatham a stennorion than bala wheal en Ostralya Thehow. Mennow gorrollion golowe thurt porthow Kernow a kemeras caar stennorion ha teeze Gernooak erel tha powiow pel.

Na, rag angye nag eram whola. En edn vlethan meeliow a stennorion araz agon pow bean rag golow tha Ostralya. Na, na reeg an dacrow reeg resak thurt a lagadgow na reeg resak rag buz edn dean. Thera e war an gorroll teag na. Therava stennor aweeth era golow tha Ostralya rag dendel mear a vuna.

Lebma edn ower e am sendgaz et e thefra a paya a dewvoh gleab. Me vedn doaz arta, meth e. Na vadama tha nakevy. Gwra credge them. Perama doaz arta nye veath muna louare ha nye ell dimetha. Na oram an peath a reegam lavaral. Scone, pagee deez arta scone, theram credge. Nena e reza moaz.

An gwenz whetha tha greffa lebben ha tho an gorroll bean en peldar, a pooza en gwenz. Scone na ra buz armorow gwage kerras than dreath. Pezealla termen vetha ne ra an armorow na e thegge thubba arta. Rava doaz arta nevra.


Leff Kernow

Y thew an daralla ma scryffys in eyth Tregear.

Pobel ver in weth ny a ve,
oos an Bretennyow in tyr ma teg.
Prydythyow a gana aga hanow coth
y thesa materneth, arluthy, haga marogyon,
ha breselaryon Keltek bras oberys ha cref
gans gota grohyn, haga hletha po gwarrak
ha lavrak gwyn palys gans grohyn thu.
Pan alsa Bretten sevall vhell ha gwer
the leverell y bredyryow hay whans y honen
in tavas Brethonek y honen the gows
clowys in pow ma kyns myll vlethan ha moy
hag in forth Keltek stella clowys in pow
"Coweth, ow hothman haw goos ow honen",
po matern, po gwycor, poscader, po tyak,
den whel vyth mas oll par ha frank.
Ha perth cof an tew arell, bys mar goth
oos an grumbla goth han hendresa Keltek
an bys arell ma pub den oll a worthya per tha
na veva pub tra oll bew gwellez dre lagas,
an oos kyns the thos an Sowsen then pow.

Rowlyys gans dorn ancuth
myll vlethan ha moy
in deweth y ma gillis
pan vs kellys agan pow
esperans the vos frank
ha Brethonek arta.

Na predyr na moy, na moy in y gever.
Kell tha thewhan rag tyrmynnyow gillis.
Kemer gwedran ha lenow hy lene
gans gwyn roos ha wheg, lowena the thry.
Po downs gans an mosy jurna ha nos;
wherth gans cowetha in gwaryow an lvk.
Kene cusk, cusk heb hendresa vyth,
ow crewetha in crys in dewvreh the gerensa.

Mas whath an hendres han golon Gernowek
a dreg inna ve hag a gry them in cosoleth.
Pandr' yllaf ve gull rag an dythyow na gwell.
Me a vyn clappya eyth ow hendasow whath
ha gwytha barha ve an heynes Brethonek coth,
nena lef Kernow a clowir whath in bys.

Flowren in y Blew

An daralla ma ew scryffys in eyth Tregear.

Hy a threhevas y fen hag hanaga.

--- Na Revrond, y myth, Ny raf wherthin nefra. Ny yllaf. Me a ovyn worth ow honyn stella fatell vea an floh hethow, pemp blowth, lymyn ow talleth bewa. Mas ny yll travyth defalyby an pith a ve gwrys. Ny vynsan gara then floh bos genys, hager dra, ha lymyn ny yllaf gava ow honyn. In della theso ge y thoff devethys. Ny ylla nagonyn ken gweras thym.

An den coth a vynwherthas.

--- Powes lymyn ha me a bys thys, chyl vean, y myth.

Hy a bowesas in gader ha keas y lagasow. An howl a splanna in ebron las heb commoll hag oll in dro thesa tros ythen ha can an govar esa ow resak in dan an gweth vhell gwyr in luar teg. Nena hy a wellas an ell esa ow powes warbyn carrack looes bras, ow mynwherthin thethy hag in dro thy dreys mos vean a worollyas, craysy in y dewleff ha flowren erell, blu ha roos aga lew, a dro thy fen. Lene a varth hy a wherthas ha nena hy a wherthas arta, pan rug crys cotha a thysempyas warnothy. An vos vean a hethas downsya haga vynwherthas haga leverys wheg then ell repthy:

--- Myr, Mehall. Y ma Mam ow wherthin. Dar nyns ew da henna.

Hy a ageras y lagasow, an wherthin war y gwelavennow whath ha lowena in y begeth. Awosa polgy bean hy a vyras in ban in lagasow fur an den coth esa ow vinwherthin cossoll thethy.

--- Gwra merci Revrond. Y thoff per tha lymyn ha me a vyn bos stella.



Mar menta dysmygya moy in kever an Kernowek rys oma, danvon e-mail thyn worth an trygvow ma,

infoatkernowekdotcom


Dallathfas   :   Daralles   :   Gunnadar   :   Tre

in English   :   en francais   :   auf Deutsch   :   in italiano   :   Home

The Cornish Language: an Kernowek or an Kernewek.

Web design, search engine optimisation and marketing by Broadband Media   ·   Web hosting by Netramp
©1997-2015 Penglase.com All rights reserved. The individual site contents are the property of Kernowek.com